Eksamenjier - eboek

Sjieuwe Borger is net berne yn Fryslân, mar syn memmetaal is al Frysk. Syn debút Modesta ferskynde ein jierren ’90 as feuilleton yn it underground tiidskrift Blauwe Fedde. Hy skreau it mei syn freon Dikky van der Veen, dy’t begjin 2015 stoar.
Wat opfalt yn it wurk fan Borger is de taal. Wêr’t de taalmasters úthâlde dat Frysk Frysk bliuwt netttsjinsteande alle ynfloeden út oare talen, is Borger wat oars fan betinken. It lit him lêze; men moat it kopke der al by hâlde.
Fan de personaazjes, de popkes, yn it wurk is wol ris sein dat se frijwat tin binne. Borger kin him der net om bekroadzje. Hy is fan betinken dat de lêzer sels in grutte ferantwurdlikheid hat by it ynfoljen fan de karakters; in boek is no ienkear gjin tillefyzje en moat it jin net te maklik meitsje; it kopke moat der by bliuwe.
Eksamenjier is Borger syn fjirde roman. Al nei de earste roman waard skreaun dat it dêr by bliuwe soe. Itselde waard wer sein nei syn twadde roman. Mooglik hat it te krijen mei it soarte boeken dat Borger foar it ljocht bringt. It kin ek wêze dat syn boeken ôfwike fan de ferwachtingen. Se oerstige it sljochtweihinne provinsjale, en spylje yn it akademysk miljeu. Dat ferget in oare oanpak; in boek is gjin middel om yn sliep te fallen op bêd.
Mei Eksamenjier hat de skriuwer ynset op de young adults. Sels hat er wer in protte wille hân oan it skriuwen, en al stiet der no neat op priemmen, hy is der wis fan dat der wer wat komt.